அருள்பெற்று வளமாக வாழ்வோம்!

இன்று மலர்ந்திருக்கும் ஹிஜ்ரி புத்தாண்டை வரவேற்று மகிழ்ந்திருக்கும் அனைத்து முஸ்லிம் சமுதாயத்தினருக்கும் என் புத்தாண்டு வாழ்த்துகளைத் தெரிவித்துக் கொள்கிறேன்.

உலகில் ஒவ்வொரு மொழி பேசுபவரும் ஒரு சமுதாயத்தைச் சேர்ந்தவரும் தங்களுக்கென ஓர் ஆண்டு கணக்கை வைத்திருக்கின்றனர். அதனைக் கணக்கிடுவதற்கு ஏதேனும் குறிப்பை தொன்று தொட்டு நடைமுறையில் வைத்திருப்பது வழக்கமாகும். இஸ்லாமிய ஆண்டு முஹர்ரம் மாதத்திலிருந்து ஆரம்பமாக கணிக்கப்படுகிறது. இஸ்லாமிய வரலாற்றில் மிகப் பெரிய எழுச்சியையும் புரட்சியையும் ஏற்படுத்திய ஹிஜ்ரத் எனும் வரலாற்றுச் சிறப்புமிக்க பயணத்தை வைத்துதான் இஸ்லாமிய காலண்டர் உருவாக்கப்பட்டது. உடமைகளையும் உறவுகளையும் பிரிந்து ஹிஜ்ரத் செய்ததன் மூலமே இஸ்லாத்தை பரப்ப முடிந்தது. அப்பேர்ப்பட்டவர்களால்தாம் இஸ்லாமிய சாம்ராஜ்யம் உலகெங்கும் பரவியது.

நாம் இஸ்லாமிய புத்தாண்டை வரவேற்கும்போது இந்த மாதத்தின் புனிதம், ஆஷுரா நாளின் சிறப்பு, ஹிஜ்ரத்தின் புதிய தொடக்கத்தின் மகிமை, அர்த்தம் அனைத்தையும் மனதில் கொள்ள வேண்டும். நாம் ஒரு சிறப்புமிக்க சமுதாயமாக திகழ சில அர்ப்பணிப்புகள் செய்தாக வேண்டும். புதிய சிந்தனைகள் உதயமாக வேண்டும். அதற்கு மன உறுதியும் நம்பிக்கையும் தேவை.

அருள்மிக்க தேசம் வளமிக்க சமூகம் ‘ என்பது 1441ஆவது ஹிஜ்ரிப் புத்தாண்டின்  கருப்பொருளாகும். பல்லின சமுதாயத்தினரும் ஒற்றுமையுடனும் ஒருமைப்பாட்டுடனும் வாழும் இந்நாட்டில்  அனைவருடனும் நாம் நல்லுறவைப் பேணி வளமுடன் வாழ எல்லாம் வல்ல அல்லாஹ் நல்லருள் புரிவானாக; ஆமீன்!